Kohima nung nisung ka zükset

Dimapur, February 23 (TYO) : February 22, 2016 anepdang 7:50 ako meta High School/New Secretariat lenmang tsünglanglen nisung tasümang ka lir ta Police Control Room Kohima nungi North P.S. Kohima nem osang sangoktsü.
Iba osang angazükba sülen North P.S nungi police telok ka tesem tonga oa reprangdangdang lenmang tsünglanglen tasümang ka angu aser NHAK nung post mortem agitsü atema bener ao, ta Sub-Divisional Police Officer & PRO, Kohima-i sangdong ka nung metetdaktsü.
Tasüsangji asür Subash Dey’er jabaso Rahul ta tenu Kishor Dey-i ajitet aser iba sülen mangji par kinünger ket nung agütsü. Iba dak sendakba nung ken o benoker bushisüngdanga aodang, nisung pezü apu, ta Kohima Police sangdong nungsa shia lir.
Par pezüji Hantong Konyak, Ngamphong Konyak, Lipise Sangtam aser Ajumong Sangtam nungertem lir aser parnok dang asüngdangya asüdang par pezüi asür Rahul zükset ta nangzük.
February 21, 2016 aonung parnok medemer ka kidang chi chiyungtepa kazüba sülen par pezü den Rahul Dey Kezekie nungi taxi ka taa agüja High School Junction tashi ao. Idakji parnoki yi alia ajem aser New Secretariat leni aodang, asür Rahul Dey o Ngamphong Konyak na mangattep adoka teka sangshitep. Idangji Lipise, Ajumong aser Hantong nungertemi Ngamphong pusema Rahul dak azüktsü tenzük. Iba mapang Rahul ji yi agi meseper liasü aser pa ali nung laoa lir par pezüi pa ajungketer lenmang tsünglanglen merepzüka yok, ta parnoki nangzük.
Par pezüprongla police ket nung yua lir aser maneni bushisüngdang südar, ta Kohima Police-isa metetdaktsü.