Kohima nung nisung meyirjang aika adenshia shilem agi

Kohima, September 1 (TYO) : Tanü Kohima nung tzünglu kanga aruaka Kohima Village Council (KVC) aser Kohima Village Youth Organisation (KVYO) nati lungkak aitba sentong ayongzükba takok ngua agiogo.
Arishi küm 61 tain tantsür ka tashiyim agi raksatsüba aija lungkak aitba sentong nung lanur aser taintem ajunga pei kin sobutsütem sobur Kohima jila nung shilem agi.
August 22, 2015 nü Tesophenyu yimer Thanwalo Magh-i Kohima yimtsüng nungi tantsür ka tashiyim agi raksatsüba aija tanü KVC aser KVYO nati iba lungkak aitba sentong ayongzük.
“Asen lokti nung tetsürtem kümzüka alitsüsa kümdakjang”, “Tashiyim agi raksatsürtem dak taochi mesayutsüla”, “Tashiyim agi raksatsür, onoki na atakatemer”, “Tongtipangtibaji Yimjung & lendong nungi jenbua aliba”” aser “Ner lokti, ner sobaliba metetang” ta tezülubatem amer tanü lungkak aitertemi yimdong sema jaja.
August 22 nü Thanwalo Magh-i tantsülaji alu inyakya lia tashiyim agi raksatsüba dang masü saka la tepsettsü merang, ta tanü Kohima Local Ground nung sentong agidang tantsürlar kinünger kati ashi.
Tashiyim agi raksatsüsangji aoba sülen lai ana nung aliba alu kati ao aser osang sangoktsü, ta paisa ashi.
Thanwalo Magh ji tang police ket nung lir. Pa ya KVYO züngsemtemi apu aser August 24 nü police ket nung agütsü.
Iba tatalokba nung tantsülaji kanga mejungi yiru aser la dang Kohima nung mozü ki ka nung anepaludar.
Tanep tzünglu kanga aruaka nisung meyirjang aika High School lenjem nung adenshi aser parnoki Ministers’ Hill nung Chief Minister TR Zeliang’er residential office-i ao. Idakji KVC aser KVYO nati Chief Minister nem tezüluba ka agütsü.
Kohima jila mokdangtsü atema osang kecha meliaka tanü shishilembartem aser educational institution temia takoksa ajurur pusema shibang.
Iba tatalokba ya kanga dang süoki ia agitsüla aser tai tonglokja alisangji tepuokdak nungi mechioktsüla. Iba takhangba anema inyakra Kohima Village-i mapa inyaktsü, ta KVC aser KVYO nati metetdaktsü.
Kohima nung alirtem lendong nungi kümzüka ayutsü atema sorkari police tem peria mapa lemzüktsütsüla aser ano Kohima jila nung tongtipang tesemtem asadanger CCTV ayutsüla, ta KVC aser KVYO nati sorkar dang ashi.
Parnokisa state sorkar dang Nagaland nung forensic laboratory ka lapoktsü takhangba agütsü.
Tanü Kohima local ground nung sentong agidang, Angami Public Organisation tir Vilhousa Seleyi, Kohima Village Council chairman Neivor Rutsa, taoba Angami Gazetted Officers tir Krotho Vipralhou Kesiezie, Kohima Village Women Organisation tir Khriengu Kesiezie aser Rengma Hoho nungi lennir nungertemi o jembi aser parnoki aibelensangji ozüng tesashi agi merenshitsü takhangba agütsü.