Kohima nung nisung tepsetba anema lokti apuso

March 29, 2015 anogo nung  Kohima nung nisung tepsetertem nem yakta ochiobendang agüjang ta takhangba agüja nisungtem jajaba noksa nung angur. July 09, 2015.

Kohima, July 09 (TYO) : Taküm 2015 küm March 29 nü Kohima nung Viswema nunger ka tenüng agi Tepumecie Lcho tepsetba mapa anema tanü Brehostibar nü Kohima town nung Southern Angami purtem nisung meyirjang junga adenshir parnok tejashi sayua yimdong süa jajaba sentong ka ayongzüka agiogo.
Iba sentong ya Viswema putu mendeni ayongzükba liasü aser iba sentong nung adenertemi PHQ lenjem nungi tetsüng agi jajaa lur District & Session Judge Kohima nem takhangba onük kar tezüluba nung agütsü.
Iba tezüluba nung Viswema putu mendeni ashiba agi, par yimer asür Tepumecie Lcho ya March 29, 2015 aonung Jail Colony, Kohima nung par kidang nungi Khonoma nunger asür Aja Terhuja’er jabaso Kruse Terhüja, Nachama nunger Lavotoulie Rupreo’er jabaso Vilalhoulie Rupre-o aser Gariphema nunger Neizelie Pielie’er jabaso Kezhaletuo Pielie par asemi anir ao. Iba sülen par asem jagi paji mejangjatetba tesem kati ani orr yangji reshikangshia südaktsü aser tasümangji pa gari nungji enoker par asem jagi Meriema yimtak endoka toktsü. Tanünepji yimtaklirtemi tasümangji ngua Kohima police aja aser parnoki Kohima North Police Station yima bener aru.
Iba ama nisung taküm ka reshikangshia tepsetba mapaji Viswema nunger ajak mezüngmeshiba mapa ka ir. Naga nunger sobaliba nung nisung kari nisung ka yamaji reshikangshia tepsettsü memelar ta parnokisa metetdaktsü.
Tasüsangji Viswema nunger senso tajung ka asünungji, pa tepsetertemji Angami nunger sobalibai melaba ama inyaktsü asoshi Viswema yimten nem agütsütsüla ta parnokisa takhangba ka agütsü.
Ajisüaka, obendangeri nisung tepsetertemji parnok nem magütsütetra, parnok nemji obendang magütsü tashi parnokji bail nung mechioktsüla aser ano nisung kari danga nisung tepsetertemji bail nung chioktsü merangra, nisung tepsetba khuretji parnoki abentsü, ta Viswema yimtenisa metetdaktsü.
Nisung tepsetertem jagi nübortem dang nangzükba kulitemji jangjatsü atema parnok anema tezüluba nung ” charge sheet’ magütsüdang District & Sessions Judge-i Investigation Officer (I/O) nem jungjunga bushisüngdaktsütsüla, ta parnokisa takangba agütsüogo.
Viswema yimtenisa nisung tepsetba ken o okadak benoka aliba ya tekaratiba nung angadanger nübortem nem ochi obendang agütsütsüla ,ta takangba agütsüogo.