Kohima nung NSCN-K tenüng nung sen sarur 2 apu

Dimapur, March 2 (TYO) : February 2, 2016 nü Maruti gari ka nung mejangjatetba nisung kari Kohima aser temeket nung shishilembartem dang nungi tashiyim agi sen sarua senzür ta osang tejangja kar angazük, ta Sub-Divisional Police Officer & PRO, Kohima sangdong ka nung metetdakstü.

Iba osang angazükba sülen DEF Kohima Mobile Unit, District Intelligence Branch aser North Police Station nung telok ka shimer ozüng alema sen sarurtem aputsü atema yok.

Iba mapang Maruti gariji Local Ground, Kohima nung Southern Gate anasa anena aliba angu aser idangji gari nung nisung ka mena lia apu.

Iba nisungji Niheto Assumi’er jabaso Shikuto Assumi ta jangjaogo aser pa ya Daklane Colony, Kohima nung telidak lir.

Police-i Shikuto dang asüngdangya asüdang pa aser Kahoto Assumi ta ser nisung kati NSCN(K) tenüng nung shishilembartem dang nung sen saru ta nangzük. Idangjisa police-i nisung tanabuba aputsü atema bushitep tenzük aser ghonda ana tsüngda Razhü Point, Kohima nung apu.

Iba nisungji asür Kiyehe Assumi’er jabaso Kahoto Assumi ta jangjaogo aser pa ya Amphoto Colony, Zunheboto nung telidak lir.

Tenati police dang ashiba agi NSCN (K) nung Deputy Secretary inyaker Khetoshe-i tena dang Kohima jila aser temeket nung shishilembartem dang nungi sen sarutsü atema tetuyuba agütsü.

Tena ket nung Finance incharge Kohima District, S.K Assumi-i February 25, 2016 nü GPRN, Office of the Military Finance NSCN/GPRN- K tenüng nung züluba shidi ka bena liasü.

Iba dak sendakba nung Kohima North P.S nung ken o ka benokogo aser maneni bushisüngdang südar, ta Kohima Police-isa metetdaktsü.