Kohima nung NSDMA-i ayonga NEPex mock drill agi

Kohima, Rongchii/April 26 (TYO): Tanü, Rongchii (April) 26, 2018 nü Nagaland State Disaster Management Authority (NSDMA) den National Disaster Management Authority (NDMA) nati senteper Kohima nung Nagaland Emergency Preparedness Exercise (NEPEx) exercice ayongzüka agiogo, ta ketdangsertem osang ka ajanga metetdaktsü.
State yimtiba, Kohima nung tanep 10:00 ako nung ‘siren’ ola agutsüba sülen mock drill tenzüka liasü.
Menoknok tasadangba 8.7 Magnitude nung menoknok anokba ajanga teraksatsüba nung yariteptsü atema state yimtiba nung disaster management forces ajak renema liasü.
‘Siren’ ola agutsüli school, kaket rejutem aser office balala nung nisungtemi ‘siren’ ola tanaben magütsü tashi minute ana shi tejenokdak bushia liasü.
Iba denji mesüktepa stakeholder temi pei teka mesüra oset agi tekolak nembanger tejenokdak tesemtemi (Pre-Identified Safe Zone) ao.
NSDMA indang NEPEx ya state tesem ajaklen lendong tsüdong mapang renemshia alitsü atema agiba Emergency exercise ka lir.
Nagaland ya Seismic Zone nung denema lir aser menoknok, anentsüh, tzümetsüng, yipru aser merok mi ama alima tzümopung lendong balala ataloktsüsa aliba tesem ka nung lir.
Tanü mock drill ji teshimtet tesem 56 nung agiogo, aser item rongnung hospitals, shopping malls, school, office, Market, Tenla ki, post office aser ki aika amentepa yangluba building nung agia liasü.
State kübok district 11 nung Nepex indang Incident Report ajanga ashiba agi, item ama lendongtsüdong nung asürtem ajak agi 133, kanga mejungi yirur 234 aser tera yirur nisung 417 lir.
Tanü iba exercise nung NDRF, Health, Police, Fire fighting, Information & Public Relations aser Transport ama tongtibang department balala nungi tongti ketdangsertemia shilem agia denogo.