Kohima nung Opium bener nisung ka apu

Dimapur, April 10 (TYO) : April 09, 2017 aonung 9:00 ako meta Kohima Phesama check gate nung nokdakertemi teti inyakba ama mita reprangba mapang gari No MN01G-0500 keta aliba, Dimapur-i aluba Tata Winger gari ka mita reprangdang nisung ka dak temulung malemtsü yimya kar angu aser ibasang jagi pa Assam Rifles-a ta ashi.
Pai indang yangkhu reprangdangtsü meshidang pai, police-i Assam Rifles indang yangkhu mita reprangtsü temeten mali, ta ashi.
Ajisüaka tesüiba mapanga Manipur nungi Armed Force temi temesepba mozü shibelenba puteta aliba agi police temi pa indang yangkhu reprangdang dang Opium (latex) gram 975 shi bena aliba putet.
Police-i opium ji everyday mamatsü asepba pongdang ana aser golden pongdang 8 nung kanga junga seper apu.
Pai, ni iba opium ji sen 55,000/- agi ali aser ozü yimtaki bener aoerba asü, ta nangzükogo.
Pa ya Bupalghat, Dist – Jodhpur, Rajasthan nungi Budharam’er jabaso, arishi küm 32 tain, Nathu Ram ta jangjaogo. Tang ya pa Ukhrul, Manipur nung ‘F’ Coy, 21 Assam Rifles nung Havildar teinyakdak lir. Pa dang police-i pua lir aser iba dak sendakba nung tali bushisüngdangtsü asoshi Kohima South PS Case No. 0027/17 U/S 22 (c) NDPS Act kübok ken o benokogo.