Kohima nung Orientation Programme agi

Dimapur, November 20 (TYO) : November 19, 2016 nü DC indang Conference Hall, Kohima nung ‘How to approach Civil Services Exam’ (UPSC and NPSC) ta ser Orientation Programme ka agi.
Iba sentong nung shisalen sayurtemji- Kethosituo Sekhose, NCS, SDO (c) Sadar Kohima, M.A. Shihab, IAS, Joint Secretary Power Department aser Reny Wilfred IAS, Assistant Commissioner Kohima nungertem liasü.
Kethosituo Sekhose-i kaketshir ka taküm nung mapang timi amshiba indang onük jembidang, “asenok ajak asoshi langka ka kasa lir aser ibaji mapang lir” ta ashi.
Kaketshirtemi pei alizüng atongtsü atema mapang timi amshitsüla aser state yimtiba adener aliba tesemtem nungia lanurtem aruba atema kanga pelar, ta Kethosituo-isa shisem.
M.A Shihab IAS-ia pai ajangshia arubatem lemsatepdang, kaketshirtemi pei alizüng jungjunga angatetba sülen ibaji atongtsü merangtsüla ta ashi.
“Takoki ola tulu adoktsü anungji nenoki ola madoki dang merangang” ta paisa kaketshirtem ayongzük.
Reny Wilfred IAS-ia kaketshirtem dang meranga inyakba ajanga maongkatem agitsü aser tarutsü atema telemtetba tajung agitsü ayongzük.
Iba training nung “How to approach UPSC/NPSC, Books, tips, and tricks”, “Whether to go for coaching or not?”, “How to prepare along with your studies or job, other high paying or remunerative career options, why do you want to join government service?”, “Avenues of IAS/UPSC and NCS/NPSC” onüktem jembi aser ano lokti sensaksemba mapang General Career Guidance shilema liasü.
Iba sentong ya District Administration Kohima ajanga ayongzük aser mendenji Neilezo Tep, SDO (Civil) liasü.