Kohima nung ‘Penta School of Music’ lapokogo

April 12, 2016 nü Sundry Homestead, A.G. Road, Kohima nung Class-I Contractor, Vilelie Khamo-i ‘Penta School of Music’ lapoktsüba noksa nung angur.

Kohima, April 12 (TYO): Tanü April 12, 2016 nü Sundry Homestead, A.G. Road, Kohima nung Class-I contractor, Vilelie Khamo-i Penta School of Music (PSM) lapoktsüogo.
Iba sentong nung tongti tejaoker o jembidang Vilelie Khamo-i Penta School of Music (PSM) Advisor aser proprietor, Keneikrül Noswe-i iba reju tenzükba atema tenüngsang agütsüba den külemi, ken meimer ka ama kibong atema iba ya alizüng ka tongtetba ka lir, ta metetdaktsü.
Pai ashiba agi, “Keneikrül’er jala tantsütila, Lozinü ya tebu ajanga ajungmesoa liasü, aser lai PTBS Philippines nungi Master in Church Music (MCM) agiogo, aser tanübo la PSM Director lir.”
Khamo-isa, nisung ajaki pei sempet shimtetba dang masü ajisüaka taküm nung nükjidong atongtsü atema teinyaker kaka asütsüla ta shia, “Mangdang ka yur sempet shimba ajanga takok lenmangi anitsü,” ta ashi.
PSM Advisor, Keneikrül Noswe-ia iba reju lapokba indang metetdakja, ken meimertem nem music education tajung agütsütsü nükjidong nung iba reju amenok, koba ajanga parnok tarutsü tia tajungbaleni anitsü aser music nung parnok nükjidong ataloktsü, ta metetdaktsü.
Pai ashiba agi, ‘PENTA’ logo ajanga tanur pongu den Motto “Peshakemo pfe” sayur.
Iba sentong ya Dr. Hovithol Sothu lenisüba kübok agi aser UBC Pastor Rev. Hosoto Kiso-i Tsüngremer temoatsü meshizüka saradsadem.
Kasa sentong nung PSM Director, Lozinü Nowse-i Reju sentongtem aser nükjidongtem metetdaktsü, ABCC Tsüphiekro ABCC, V. Khamo Rüvekro 2016 aser kibong züngsemtemi ken ka aten, Pastor VBC, Rev. Atha Neikha-i team atema sarasademtsü aser Swedele Nowse-i anküp tepela o jembia sentong tembang.