Kohima nung PET tem Yoga orientation-cum-training agidar

Kohima, March 14 (TYO) : Mongulbarnü Ura Academy Hall, Kohima nung Directorate of School Education-i ayonga Physical Education Teachers (PETs) tem atema pungunü amungba Yoga orientation-cum-training ka tenzüktsüogo.
Training nung adentsü arurtem ayongzükba mapang RMSA mission director Limawapang Aier-i, Nagaland nung iba mesükba training ya tan mezüng ayonga amunger aser iba kasa training ya tanabuba telok nema agütsütsü, koba memunui metetdaktsütsü, ta ashi.
Pai, junga angazükang aser nenoki angazükbatemji pei school tem nung oa süngjang tanga sayuang, ta PET tem dang ashi.
Paisa, iba training atemba sülen nenok Training of Trainers (ToT) akümtsü, ta metetdaktsü.
Aier-i, Yoga ya temang anema alitsü asoshi kanga nüngdak aser ibai exercise asoshi kanga junger, ta shisem.
Iba sentong lapokdang assistant director (PE), I. Temjen Ao menden liasü aser deputy director (PE) T. Lipok Jamir-i tarurtem pela agizük.
Iba training sentong nung Kelhouzasei Lawrence instructor lir aser iba ya March 18, 2017 nü tashi akatsü.
Osang ajanga ashiba agi, Yoga ya physical aser health education atema subject ka lir aser linük nung Board of Secondary Education (CBSE) kübok aliba school tem ajak nung physical inyakyim ka ama benshir.
Senior secondary purtem asoshi Physical education curriculum nung Yoga ya telen ka amai lir. Iba den külemi University Grants Commission(UGC)-i Under graduate aser Post graduate purtem atema Yoga ya temang anema aliyim, chiyungtsü achiyim, temang tashi ita aliyim aser sadoka aliba tsütsü subject ka ama agitsü metetdaktsüogo.