Kohima nung Plastic oset nokdangtsüba dak sendakba nung senden amen

Dimapur, Rongjui/September 24 (TYO): Kohima yimtsüng, Chedema yimtsüng aser Chede Model Village nungi youth organizations tongtitem den SDO (C) Sadar, Kohima office chamber nung September 23 nü senden ka menogo. Iba senden ya khen dang amshiba plastic osettem October ka nü nungi tenzüka nokdangtsü sentong aliba atema inyakyimtem asateptsü asoshi ayongzüka menogo.
Senden nung Kohima Sadar kübok tamalen shisema aliba lokti tem den longjemer maparen balala inyakyonga aotsü asoshi telemtetba agiogo. Senden nung Kohima Sadar kübok khen dang amshiba plastic oset tem nokdangba dak sendakba nung tangazükba agütsütsü aser iba sentong achayangtsü atema Village Level Task Force amenokba sentong ka DC’s Conference Hall, Kohima nung 26/09/2019 agitsü lemtet. Maneni Kohima , Chedema aser Chede Model Village, Council Hall nung 26/09/19 nü RO Water Purifiers amenoktsü lemtet.
Yimtsüng asem nungi volunteer temi pei yimtsüng nung iba ken o dak sendakba nung tangazükba agütsütsü asoshi yimsüa senzüba sentong achaayang agitsü. Senden nungsa sentong balala agiba mapang biodegradable banner tem amshitsü telemtetba agi. SDO (C) Sadar, Longasen-i Kohima Sadar kübok yimtsüng aser stakeholders ajak dang khen dang amshiba plastic oset nokdangba takok ngua benoka inyaktsü asoshi teyari agütsütsü mepeshia metetdaktsüogo, ta DPRO Kohima sangdong ka ajanga metetdaktsü.