Kohima nung Primary tesayurtem atema training agidar

Kohima, April 29 (TYO): Ura Academy Hall, Kohima nung Educational Block Research Centre (EBRC) L Khel Kohima village-i ketdangsüa tang teinyakdak primary aser upper primary government school tesayur 200 shi anogo pezünü Learning Outcomes training agidar, ta tanü ketdangsertem osang ka ajanga metetdaktsü.
Hombar anepdang iba training tetenzük sentong nung jembidang EBRC L Khel Coordinator, Visato Koso-i, sorkar school tem nung shisaliok agütsütsü atema tongtibang süa rangloker meinyaker, aser ibaji ajanga kaketshirtemi takok junga mangur, ta metetdaktsü.
Iba dak sendakba nung pai, Union Ministry of Human Resource Development aser Department of School Education Nagaland nati tanurtem nem shisaliok agütsütsü tongti süa rangloker inyaker, koba ajanga tesayurtemi shisaliok tajung agütsütettsü aser kaketshirtema primary level nungi shisaliok nung renloktsü, ta ashi.
Pai ashiba agi, anogo pezünü training ya Primary aser Upper Primary tesayurtem atema shilem anana küma lemsar agitsü, aser item training nung kaketshirtem lanuwa yongi career yanglutsü, loktiliba, linük aser tsüraburtem den tesayurtem tesendaktep alitsü, pei mapa nung mongin akümtsü, aser ketdangsüba nung tesayurtem teinyaktsü shilem onüktem nung agitsü.
Kaketshirtemi angazükba jenjang tajungba akümtsü atema kaketshir aser tesayur na tsüngda tesendaktep tajung alitsüla, ta shia pai primary aser upper primary tesayurtem dang class takdang nung sayubaren melenshitsü atema pei teinyaktsü shilem junga inyaktsüla, ta ajungshi.
DMA SSA Kohima Additional District Coordinator, Thongsenlo-i, government high schools nung azünger kaketshirtemi tekübokba class pur indanga akoktsü tasak ta study ajanga bushitetogo, ta ashi. Iba dak sendakba nung pai state nung shisaliok lenla ajungalen renloktsü atema rangloker inyaktsüla, ta ashi.
Training mapang nung shisalen sayurtem- Ketouneinuo Mepfhü-o, Kikruneinuo Liezietsu aser Mimi Yhoshü nungeri Learning Outcomes, psychology, learning outcome in-early childhood, English, diksha, science aser social science onüktem densema tesayuba agütsütsü.
Iba training ya May 2, 2019 nikongdang tembangtsü.