Kohima nung Public Pay & Use Toilet ka lapokogo

April 12, 2016 nü Officer’s Hill (Thegabakha) Colony, Kohima nung Public Toilet lapokba sülen Deputy Advisor, CPHE&EO, Rohit Kakkar den KMC Administrator, Kovi Meyase aser tangartem külemi agiba noksa angur.

Dimapur, April 12 (TYO) : Mongulbarnü Officer’s Hill (Thegabakha) Colony ward No.10, Kohima nung Public Pay & Use Toilet ka lapokogo.
Metsümeshidakji Indian Red Cross Society Complex jakdang lir aser tanü Central Public Health Engineering and Environmental Organization, Deputy Advisor, Rohit Kakkar-i lapoktsü.
Linük nung metsümeshidak yangluba ya kanga dang tongtipang mapatem rongnung ka lir. Linük indang rongsenkettsüng nungi shilem 6 dang merükmejuba maparen nung amshir, ta tanü tongti tesemdanger o jembidang Rohit Kakkar-i ashi.
Iba kiyong nung alirtemi metsümeshidak tajung yangluba atema paisa tenüngsang agütsü nübortem dang metsümeshidak merükmejua ayutsü ayongzük.
Tanü sentong nung OHCC General Secretary, Roukuolhouvo Miachieo-i metsümeshidak yangluba indnag osang metetdaktsüdang, iba pay & use toilet ya Swachh Bharat Mission kübok sen 4,17000 endoka yanglu, ta ashi.
Teindokba sen nungji sorkari sen 1,40,000 aser tanüngba sen 2,77,000 ji nübortemi tenla agütsüba liasü, ta paisa shisem.
Iba metsümeshidak tenük-telen mabensar asoshi yangluloka lir aser parnokbo angati dang amshitettsü, ta Roukuolhouvo-isa metetdaktsü.
Paisa, T. Khel, Kohima Village-i ali tenla agütsüba atema pelaba metetdaktsü aser mapatong nung Government Agency, Community, PHE department, Sanitation committee of the Officer’s Hill (Thegabakha) Colony Council, Urban Development department, Kohima Municipal Council tem külemi yaritepba atema pelaba shisem.
Iba sentong nung mendenji KMC Administrator, Kovi Meyase liasü aser paisa tesentepertem pela agizük.