Kohima nung Rajya Puruskar sentong agi

April 22, 2017 nü Raj Bhavan, Kohima nung Nagaland Angh, P.B Acharya-i Rajya Puruskar sentong nung jembiba noksa nung angur. Kohima, April 22, 2017.

Kohima, April 22 (TYO): April 22, 2017 nü Raj Bhavan, Kohima nung Scouts & Guides Association Rajya Puruskar sentong agiogo, aser iba sentong ketdangserji Nagaland Angh, P.B Acharya liasü.
Onük jembidang P.B Acharya-i, Scouting movement nükjidongji lanurtem temang, shisatsü, skills, loktiliba aser tanela nung terenlok kaa khuret angatetba senso kaka akumtsü atema lir, ta metetdaktsü.
Paisa, Scout & Guides ajanga nisung kati khuret taliba angatettsü, tazüokba nung alitsü, melungsentsü temerük alitsü, jembiba aser inyakba ajak asüngteta lidaktsür, ta ashi.
Paisa lanurtem dang iba maparen nung adentsüla, koba ajanga asen linük tejakleni anitsü aser asen lokti nung shilem tajung agitettsü, ta ayongzük.
Kasa sentong nung State Chief Commissioner, Rev. Fr. Dr. Sojan Puthankudy-ia, langka temelenshi atema asenoki asalentong tasen ka amshitsüla, koba ajanga tang teinyakdak tasa intoktsü, ta ashi.
Paisa, Scout & Guides mapatong ajanga yimya tajungtem angazüker aser tazüokba nung alir, aser lanurtem Tsüngrem tsübua tazüokba nung aniteter, ta shisem.
Iba sentong tetenzüklen State Vice President HSG, Fr. Dr. Mathew Thuniampral-i Angh nem ‘scarf’ ka agüja tetushi agütsü.
Paisa NTC cum Secretary for North Eastern Region aser Nagaland State Hindustan Scouts & Guides-India, Gnana Nirmala-i züluba kaket, ‘A manual for Hindustan Scouts and Guides’ sayaja liasü.
Iba sentong ya Rajya Pushkar award angur, Sherry Jindal lenisüba nung agi aser State Training Commissioner Guide, Anna-i lokti pelaa agizüka liasü.
Tatemsa NTC cum Secretary for North Eastern Region and Nagaland State Hindustan Scouts & Guides-India, Gnana Nirmala-i tepela anküp o jembia tembang.