Kohima nung rakzükraktemer ka apu

Dimapur, November 12 (TYO) : November 12, 2015 nü Kohima nung A.G point anasa mejangjatetba nisung kati shishilembar ka ket nungi tashiyim agi sen rakzüker ao ta South Traffic Control, DEF Kohima kübok traffic duty alirtem dang osang sangoktsü.
Mejangjatetba nisung jagi sen 5900 rakzüker local taxi ka nung jena ao ta angashiba sülen traffic duty nung alirtemi Anti-Extortion Team den yaritepa gariji arrshia orr AG road area, Kohima nung pushi, ta Sub-Divisional Police Officer & PRO, Kohima-i sangdong ka nung metetdaktsü.
Iba dak sendakba nung bushisüngdang asüdang iba nisung yagisa anogo ishika tejaklen TCP gate, Kohima nungia shishilembar ka ket nungi sen 10,700 rakzüka bener ao. Iba nisung ya Leshemi nunger Pfukrunyi Kazhie’er jabaso Krowe Kazhie lir, ta sangdong nungsa shia lir.
Iba dak sendakba nung Kohima South PS nung ken o ka benokogo aser maneni bushisüngdang südar, ta Kohima police-isa metetdaktsü.