Kohima nung regional Transport Authority senden amen

Dimapur, Monupii/May 2 (TYO): Kohima Deputy Commissioner, Anoop Khinchi IAS-i ayonga Regional Transport Authority (RTA) Kohima senden ka pa indang office nung menogo, kong RTA züngsemtem dena liasü.
Senden nung Kohima jila nung gari senzüsenpongtsü mesademba aser commercial transport inyakyim amala onük nung ajemdaker sensak asem aser item tebilemtsütem bentettsü asoshi item telemtetba agi; lenmang tezülen ki asütsü atema oset bendena aliba agintsü, lendi nung shishilembartem, Kohima Municipal Council KMC-i teyuba sülen anidaktsütsü aser stand tasentem mamshitsü, koba senzüsenpongertem atema yangluba lir.
Gari senzüsenpongtsü mesademba (traffic congestion) dak sendakba nung North side – Local Ground tesem nung public garitem yudaktsütsü aser dokan kiburtem indang gari ayutsü asoshi tesem kar shimtsü sensaksema liasü. Maneni city bus tem dak sendakba nung, station melena nisung anikettsüba aser aludaktsüba tesem kar shimtsü aser permit agüja aliba lenmang nung dang senzütsü aser tenüng keter taxi anishirtem uniform yanglutsütsü aser iba dak sendaka aliba lokti aser kija den maneni angatetteptsü asoshi senden nung telemtetba agi.
Taxi permit dak sendakba nung, local/regional taxi permit bena alirtem ken o sensaksem aser permit bena alirtemi parnok indang taxi anishitsü telemtetba agi. Kasa mapang nung taxi permit ya transfer mesütettsü ajungji local/regional permits ayoktsü atema osang kaket tem nung advertisement adoktsüba ya ozüng anema lir ta nenshia metetdaktsü. Senden nungsa enforcement team-i mapang shia inyakyim asadangtsü lemtet, ajiasünungdang temelaba agütsür aliba nisungi dang taxi anishitettsü. Maneni Municipal kübok taxi anishitsü atema special permit ka nungdaktsü ta metetdaktsüba DPRO, Kohima sangdong ka ajanga metetdaktsü.