Kohima nung Rev. Neiliezhü Üsou Music Award agütsü

Kohima, June 17 (TYO): June 17, 2017 nü Minister Hill Baptist Church, Kohima nung state tesem ajaklen nungi Higher Secondary School Leaving Certificate Examination 2017 nungi shimteta Rev. Dr. Neiliezhü Üsou Memorial Music Award agutsüba den külemi Minister Hill Baptist Higher Secondary school nungi toppers nem tetushi agütsüba sentong ka agiogo.
Iba sentong nung Chief Engineer PHED Nagaland, Er. Kevisekho Kruse tongti tesemdanger liasü.
Iba sentong nung jembidang Er. Kevisekho-i, School ketdangsertemi Rev. Dr Neiliezhü Üsou senmang wazüka maneni inyakba atema tenüngsang agütsü.
Pai ashiba agi, asür Rev. Dr Neiliezhü ya taochi aketba nisung ka aser ajak yaritsü melunga aliba nisung ka liasü.
Pa ya Pastor ka dang masü saka music nunga walunir rongnung ka liasü, ta paisa metetdaktsü.
Tongti tesemdangerisa, Nagaland sorkari music ya Industry ka lir, ta sangdongogo, anungji lanurtem atema kentenmenü nung maongka jenti lir, ta metetdaktsü.
“Naga nunger ya kenten nung sempet kanga lir, ajisüaka asenoki nendaka meinyaker,” ta pai tesasaba olen ka ashi.
Paisa, “Kaketshirtemi kanga meranga inyaktsüla, kechiyong asenoki meranga inyakra tajung anogotem ana nung lir,” ta ayongzük.
Principal MHBHSS, Aleu Usou-ia, memorial award ya Rev, Dr Neiliezhü Usou nüngtem nung lir, koba ajanga pai inyakba mapatem bilemtettsü aser kenten nung pai inyaktetbatem atema tetushi agütsütettsü, ta metetdaktsü.
Iba award ya 2009 küm tenteta liasü, aser iba mapang nungi tenzüka küm shia High School Leaving Certificate Examination nungi topper nem iba award agütsür.
2017 küm music award ji North Field School Kohima nungi Neingusalieyano-i angu. Iba award nung senpet 15,000 den citation ka lir, aser ibaji Rev. Dr Neiliezhü Üsou’er kinüngertemi sponsor asur.
2017 küm atema MHBHSS topper ji Elozuo M Sapruna-i angu. Iba nungji senpet 40,000 lir, aser ibaji MHBHSS ketdangsertemi agütsür.