Kohima nung Rotavirus vaccine atema training agi

Kohima, May 15 (TYO): May 14-15, 2019 anogotem nung Hotel Vivor, Kohima nung district nungi Medical ketdangsertem atema anogo ananü Rotavirus Vaccine indang training agütsütsü atema Trainers training ka agiogo, ta ketdangsertem osang ka ajanga metetdaktsü.
Iba training tetenzük sentong nung jembidang Dr. Ritu Thur-i, “Tanü workshop indang tongti nükjidongji district aser block level nung master trainers adokdaktsütsü atema lir, koba ajanga asenok atema tang tasen Rotavirus indang osang proktettsü,” ta metetdaktsü.
Pai ashiba agi, WHO (2013) ajanga, küm shia arishi küm 5 ser tekübok tanur 2,15,000 dak tema asüba ya Rotavirus ajanga lir aser alima nung arishi küm 5 ser tekübokpur asüba shilem 3.4 bo Rotavirus ajanga lir ta metetdaktsüogo.
Paisa, Indian Rotavirus Strain Surveillance Network (IRSSN) ajanga ashiba agi, tanurtem tepok oa hospital nung amongba tanur shilem 40 bo Rotavirus ajanga lir.
India nung küm shia tanur lakh 32.7 hospital-i anir aoba (outpatient) ji Rotavirus ajanga lir, iba virus ajanga tanur lakh 8.72 hospital nung amonger aser kümshia tanur 78,000 asür, ta paisa metetdaktsü.
“Iba dak sendakba nung India sorkari shilem lemsar iba vaccine agütsütsü atema telemtetba agiogo aser iba maparen ya 2016 küm tenzüka liasü. Rotavirus vaccine ya ‘drops’ lir,” ta paisa ashi.
SMO WHO Dr. Pranay Dutta-i, tawa state nung Measles-Rubella Vaccine shilem 98 takok ngua agütsüba atema tenüngsang agütsü aser yamaji Rotavirus Vaccine-a junga agütsütsü imlar, ta ashi.
Pai ashiba agi, iba vaccine ya India nunger scientist temi yanglu aser Indian Company-i yanglur, aser ibaji ajanga India nunger tanurtem ajangzüktsü.
Paisa, iba vacciane nükjidong ya arishi küm 5 ser tekübok tanurtem asüba ajemdaktsütsü atema lir, aser iba vaccine agiba ajanga timtem mangutsü, ta ashi.
Social Welfare Department nungi ketdangseria, item sentong takok ngua inyaktsü atema SW Department aser H&FW Department na tsüngda amalitepa inyaktsü ajungshi.
Item Training atema national monitor aser John Snow India Pvt. Limited nungi Prabir Roy, STO-ia jembia liasü.
Iba sentong ya Marykali Yepthomi leniba nung agi.