Kohima nung Rural Development Programmes indang workshop tenzükogo

Dimapur, Rongchii/April 22 (TYO): RD ketdangsürtem atema Rural Development programme indang anogo ana workshop RD directorate, Kohima nung April 22, 2022 anogo tenzükogo.

Iba workshop ya Minister, Rural Development, Metsubo Jamir ajanga lapokja liasü aser ketdangsürtem dang state sorkar aser Nagaland nung aliba nüburtem asoshi teinyaktsü maparen balala metetdaktsü aser yimdak yimtsüngtem nung nüburtem asoshi mapa nendaka inyaktsü ajungshia liasü.

District aser block ajunga nung ketdangsür aser staff tem department ajanga ayongzükba seminar aser training nung jeretpereta adentsü ashi.

Minister Metsubo Jamir-i department ketdangsürtem dang maneni angazüktsü aser pei shisatsü tajungba kuma ministry ajanga agütsüba scheme aser guidelines tem meteta alitsü ajungshia liasü.

Iba sentong nung Commissioner & Secretary, RD, Neposo Theluo-i ashiba agi, Financial Year 2021-22 ya tayongzükba aser tetsükdaktsü kanga aliba küm ka liasü.

Khuret jenti liaka district karibo kanga junga shilem agiogo, ta pai temolung asüba ashi.

Ketdangsürtem shisatsü renloka tali awajemtsü asoshi training aser workshop tali agitsü nüngdaker aser ibaji ajanga ketdangsürtemi tajungba nung mapa inyaktettsü, kechiaser aika scheme balala indang junga memeteti inyaker, ta ashi.

Scheme indang nüngja shidak amshitsü tongtipang ta angatetdakja jembiba mapang, Theluo-i MGNREGA kübok mela aliba scheme tem junga metettsü aser scheme indang nüngja tajungba metettsü ayongzüka liasü.

Iba sentong tenzüka Director, RD, Liboni Humtsoe-i tarur pela agizükba o jembia liasü.

Iba workshop nungya VDB Fixed Deposit & Micro Finance, PMAY-(G), RGSA, XVFC, presentation on Amrit Sarovar, scheme nomenclature, Timely payments, NMMS, AO App, GIS, SECURE, BRO, GeoMGNREGA, Moringa Convergence and NREGA-Soft MIS issue indang session lemsar sentongtem agitsü.