Kohima nung samaba gari ka Assam nung angu

Dimapur, November 4 (TYO) : November 1, 2015 nü TCP Gate, Kohima nung alir Dilip Kumar-i Kohima North PS nung par driver-i Maruti Car (Local Taxi) gari auyar aoba ken o ka benok.
Iba osang angazükba sülen Police-i Inter-State Police Wireless (ISPW) ajanga osang belenshi aser mapang tatsüka lir Assam Police nungi iba gari anguba indang osang aru, ta Sub-Divisional Police Officer & PRO Kohima-i sangdong ka nung metetdaktsü.
Borpathar Police Station nung gari den nisung asem pua lir ta osang aruba sülen November 2 nü Kohima Police nungi Anti-Vehicle Squad telok ka Borpathar-i ao aser gari den nisungtemji anir aru, ta sangdong nung shia lir.
Par asem dang asüngdangya asüdang angazükba agi gari driver den teyariteper ana jagi gariji Borpathar-i bener oa sen 75,000 yong yokdoktsü atema tasa atong. Ajisüaka, idakji talir manguba agi gariji parnoki bilemba sen agi meyoktet.
Parnoki talir ka ngua jembitepdang gariji sen 40,000 yong langlanga dang ayoktsü ta ashi, saka talir jagi temulung melemi bilemba agi Police Station nungi osang tejangja metetpelatsü ao, ta police-isa ashi.
Iba nisung jagi Borpathar Police Station-i orr Maruti gari indang osang tejangja metetnüa asüngdang saka idangjibo Assam police-i Kohima Police nungi aruba osang angazüker liasü. Aji agi, idangjisa parnoki gari den nisung asemji apu.
Police-i apurtemji, Jharkhand nungi Ram Chandra Suren’er jabaso Raphael Suren (33 yrs) Assam nungi Jeetlal Pradhan’er jabaso Raju Pradhan (34 yrs) aser Nepal nunger Dil Bahadur Chetri’er jabaso Vikash (Sagar Chetri) (25 yrs) nungertem lir.
Par asem rongnung Raju Pradhan ya New market Colony, Kohima aser Vikash (Sagar Chetri) ji P TCP Gate, Kohima nung telidak lir.
Iba dak sendakba nung parnok asem anema Kohima North PS Case nung ken o ka benokogo aser maneni bushisüngdang südar.