Kohima nung SamaroJubilee amonger

Kohima, Sept.01 (TYO) : Nagaland nung Ao oshi nung ken atener nüngtugu telok Samaro tenteter taküm 2017 küm, küm 25 ajungba tenüng nung September 3, 2017 Deobar nü Kohima nung kenten sentong ayongzüka agitsü renemdagi.
Iba anogo nung Kohima Ao Baptist Arogo kübok Chandmari Fellowship nung temoatsü sentep agitsü aser kasa anogo nikongdang 5:00 ako nungi KABA Ministers’ Hill Fellowship tenla kidang kenten sentong akatsü.
Iba sentong nung Samaro ken anganer ajak aruagi adentsü pelashishia jaoker ta iba sentong anepalutsürtemi metetdaktsüogo. Iba sentong ya Samaro telok nung kentener par asem den Samaro ken ajanga temoatsü angurtem asoshi Tsüngrem tenüng sanga jubilee amongba mapang ka asütsü ta parnokisa metetdaktsü. Iba sentong nung tenla kecha mesarutsü.