Kohima nung School 3 ‘Tobacco Free School’ ta sangdongogo

Kohima, September 24 (TYO): September 23, 2015 nü DC’s Conference Hall, Kohima nung District Level Committee on Tobacco Control (DLCC) senden amenba mapang Kohima district nung School asem ‘Tobacco Free Schools’ ta sangdongogo.
‘Tobacco Free School’ National telatetbatem nung temsüa aliba ajanga school asem- Mezhur Higher Secondary School, Mt. Hermon Higher Secondary School aser Holy Family School temji ‘Tobacco Free Schools’ ta sangdongogo aser ADC Kohima, Lithrongla Tongpi-i item School ketdangsertem nem certificate agütsüba den külemi iba takok anguba atema tenüngsang agütsüogo.
State Nodal Officer aser Health & Family Welfare, Kohima Joint Direstor, Dr. H. Chishi-i department tenüng nung item School nem tenüngsang agütsüba den külemi ketdangsertem aser Committee züngsemtemi yaritepa len aniba atema parnok danga pelaba shisem.
Paisa, ‘Tobacco Free School’ ya tongtibang, kechiyong school tanurtemi moko company tem ajanga parnok koma mejungi kongshir, ibaji atangji nung mangateter, ta ashi.
Paisa ashiba agi, iba yimya tamajung nungi tanurtem kümzüka alitsü atema moko ajema akümtsü asoshi Health & Family Welfare Ministry-i meranga inyaker.
Senden nungsa District Nodal Officer (NTCP) Kohima, Dr. Arenla Walling-i District Tobacco Control Cell, Kohima indang osang powerpoint presentation ka agütsü.
Iba senden ya ADC Lithrongla lenisüba nung agi aser senden nung awareness programmes, police nem iba mapatong angatetdaktsütsü, Tobacco Cessation Centre, NRT Stock insufficient aser lokti adenshitak ajak nung moko agi yangluba moko chiyungtsütem ayoktsü memelatsü aser machitsü onüktem nung shisa lemsatepa liasü.