Kohima nung sen lakh 1.70 shi jenjang mozü apu; Nisung tepsetba atema tai tongloktsür ka apu

Dimapur, August 22 (TYO) : August 21, 2016 nü Kohima police-i Peducha check gate nung garitem mita reprangdang Maruti Car ka nung Spasmo proxyvon aika bena aliba apu.
Maruti Car (NL-06-2956) nung SP süngjang 17,000 bena liasü aser ozüng alema shibelenba mozü indang jenjangji sen 1,70,000 shi alang liasü, ta Sub-Divisional Police Officer (South) & PRO, Kohima-i sangdong ka nung metetdaktsü.
Mozüji polythene bag tem nung kanga junga sepbanger liasü aser gari tesülen indang menden nung miima yangluba tesem ka nung bena liasü. Iba dak sendakba nung nisung ka apu aser paji Tuensang district nung asür Namang Chang’er jabaso Yanger Chang ta jangjaogo, ta Kohima Police sangdong nung shia lir.
Iba dak sendakba nung Sechü(Zubza) P.S nung ken ka benokogo aser ozüng alema mozü abenerji tepuokdak yua lir, ta sangdong nungsa shisem.
Ano, tanga tatalokba ka nung Dapfhütsumia Youth Organisation, Kohima Village-i ken o benokba nung ajemdaker Kohima Police-i Neingusalie Kense ta ser nisung ka apu.
Neingusalie ya Tuophema yimer Rheizolie Kense’er jabaso ta jangjaogo aser pa ya Alder College, Sepfusou, Kohima anasa alir.
‘D’ Khel, Kohima Village nungi Dapfhütsumia Youth Organisation züngsem ka tepset ta pa dak tai tonglokja FIR ka benok aser iba dak sendakba nung Kohima North PS nung ken o ka benokogo, ta Kohima Police sangdong nungsa metetdaktsü.