Kohima nung sen lakh 25 alangba ganja apu

Dimapur, March 21 (TYO) : March 21, 2016 anepdang 4:00 ako meta Khuzama nung Kohima Police-i garitem mita reprangdang truck gari ka nung ganja seret 519 bena aliba apu.

Truck gari (NL-03A-2412) nung miima yangluba taktang ka nung ganjaji bena liasü aser national market nung ganja jenjangji sen lakh 25,95,000 shi alang liasü, ta Sub-Divisional Police Officer & PRO, Kohima-i sangdong ka nung metetdaktsü.

Iba dak sendakba nung nisung ana apu aser tenaji Senapati, Manipur nungi Suresh Kumar aser Karaiba na lir ta jangjaogo.

Ano, March 20, 2016 nü mejangjatetba nisung kari Lerie junction nung Manipur leni aoba truck garitem dang nungi tashiyim agi sen sarur ta Kohima South PS nem osang sangoktsü.

Osang angazükba sülen Kohima Police pur tesem tonga or A. Sumi ta ser nisung ka apu. Ajisüaka, iba mapang pa den nisung ka alibabo jena ao. Police-i asüngdangya asüdang jena aosangji M. Letro ta jangja aser kasa anogo nungsa pa apu.

Iba dak sendakba nung tena anema Kohima South PS nung ken o ka benokogo, ta Kohima Police sangdong nungsa metetdaktsü.