Kohima nung sen lakh 4 tema jenjang mozü apu

Dimapur, August 24 (TYO) : Phesama check gate nung Kohima police-i Manipur-i aoba Tata Winger gari ka nung ozüng anema shibelenba mozü aika apu.

Tata Winger gari (B/R No. MN-01W-6489) nung police-i Spasmo Proxyvon süngjang 34,000 aser Nitrosun süngjang 6,500 bena aliba angu. Item mozüji lakh 4,05,000 shi jenjang liasü, ta Sub-Divisional Police Officer & PRO, Kohima-i sangdong ka nung metetdaktsü.

Mozütemji totzü pongdang aser khu nung miima bena liasü aser iba dak sendakba nung nisung ana apu. Tenaji asür Thoubal, Manipur nung Abdul Aziz’er jabaso Md. Majid Khan aser Imphal East, Manipur nung Md. Basir Ahamed’er jabaso Md. Sabir Ahamed na lir ta jangjaogo, ta Kohima Police-isa ashi.

Iba dak sendakba nung Kohima South P.S nung ken o ka benokogo aser mozütem shibelenba inyakyim putettsü atema bushisüngdang ka tenzükogo, ta parnokisa ashi.