Kohima nung shi ayokdak ajak nung ‘digital weighing machine’ amshitsü

Kohima, October 20 (TYO) : Kohima Municipal Council (KMC) den Butchers’ Union Kohima Town (BUKT) nati acha-ayanga Kohima nung shi ayokdak ‘digital weighing machine’ amshitsü tenzükogo.

Tinpatti tesem nung KMC administrator Kovi Meyase-i Butchers’ Union Kohima aser Kohima Chamber of Commerce & Industries nungertem lia iba mapa tenzüktsü.

Mezüngbuba shilem tenzükba nung shi ayokdak 52 nung ‘digital weighing machine’ enoktsü aser tanabuba shilem nung tanüngba dokan 30/40 shi ka nung ayutsü. Ibaji Hornbill Festival matongdangsa tembangtsü, ta KMC Administrator-i metetdaktsü.

Kohima jila nung aliba shi ayokdak ajak nung ‘digital weighing machine’ ozüng süa amshitsü, ta paisa shisem.

Dokan kari ‘digital weighing machine’ mamshira KMC aser BUKT nati merenshitsü ta KMC Administrator-isa metetdaktsü.

Iba sentong nung mendenji BUKT general secretary Kholie Keyho liasü aser BUKT president Neiziengulie Rame-ia o jembi.