Kohima nung Smart City sentong 2016 nungi tenzüktsü

Kohima, Sept 9 (TYO) : India nung Smart City akümtsü asoshi mezüngren shimtetba yimti 98 rongnung Nagaland nunga Kohima yimti shimteta lir, anungji sangküm 2016 küm January nungibo mapa tenzüktsü asoshi Municipal Affairs Department aser Kohima Municipal Council na prongla sentong yanglu tenzükogo.
Tanü Bodbar nü yangi Kohima nung osangbenertem den jembidang, linük nung Smart City küma yanglutsü asoshi yimti 98 shimtetba nung Kohima adenbaji tia taka asütsü ta Municipal Affairs nung Secretary, Dr. Maongwati Aier-i metetdaktsü.
Smart City akümtsüba sentong ya sangküm 2016 küm January nungi tenzüktsü, anungji iba sentong inyaka aodang ali kiburtem nungi timtem majurui tangatettep nung ajak tajangzük angutsüsa inyaka aotsü atema Kohima Municipal Council den külem ser ward 19 prongla nung tangatetba agüja aotsü sentong lir ta paisa ashi.
Linük nung Kohima ya smart city küma yanglutsü asoshi nüngdakba pur ajak den shisalemsateptsü aser tesem shia nung nübortem den tangatettep ken o yanglur dang tenzüktsü.
Kodang Kohima ya Smart city kümdir, joko Kohima nung sorkar inyakyim ajak computer ajanga e-governance dang asütsü aser nübortem nüngdak aser timtem ashidaka tesem balaka mesemteta alitsü ta paisa ashi.
” Yimti nung sorkar li atsünga aruba, jana ona endokba aser mapa tamajung inyakertem mita aputsü asoshi tongtibang tesemtem nung CCTV 100 enoktsü aser idangjibo Trade License asoshia sen online ajanga dang agütsütettsü,” ta Dr. Maongwati Aierisa metetdaktsü.
Paisa ashiba agi, Smart city nungbo pipe ajanga aruba tzü ajemba atema bill pasasa adoktsü aser ibaji atema automatic water supply meter reading & smart billing system enotsü. Ibaji dang masü saka light atsükba aser janaona endokba inyakyimtem ajak tajungba küma melenshtsü.
Ano, Smart city nung alir sensakertem alitsü asoshi ki 3341 yanglutsü sentong nung lir, anungji Kohima nung alir ki makartema kasa teyariji angutsü. Ano, Smart city nung süngdonglidong atemtsüba tesem alitsü aser anü tatsük atsüzüka agitsü. Iba yimti nung mozü ki aser school ki tajungba lapoka anepalutsü aser mepu shia sobaliba sayudak tesem tajung yanglua ayutsü.
Item ajakji inyaktsü alinungji tang aliba Kohima yimti ya ulushia yanglushitsü nüngdaker, anungji nisung ajaki pei akok tashi iba sentong ya takok ngua renemtettsü asoshi yaritepdaktsüner ta paisa metetdaktsü.