Kohima nung soil testing kit training tenzükogo

Dimapur, Aenjeti/Jan. 31 (TYO): State Soil Testing Laboratory, Directorate of Soil & Water Conservation, Kohima nung ananü “soil testing kit (digital mini-lab-Pusa STFR)” sentong tenzükogo.
Iba sentong nung okila jembiba mapang Joint Director, K. Khekiho Shohe-i ashiba agi, rongsenketsüng renloktsü atema Government of India-i ali ketdangsüba nung temulung agütsür. Aser National Mission for Sustainable Agriculture (NMSA) kübok soil health management scheme ya linük tesem ajungalen mapa küma inyaker. State nunga iba mesükba sentong ya department-i mapa küma inyaker, kong state tesem ajungalen nungi ali temo sample bendena asadangtsü aser aluyimer mesüra nüburtem nem pei aliba tesem nung ali temo aliba osang sangoktsüba ajanga tapet metsü yoktettsü.
Paisa training agirtem dang tejangraba tulu nung shilem agia Digital Mini-Lab-PUSA STFR ta nüngja agüja aliba hadir amshia ali kanga junga asadangtsü ajungshi. Digital Mini-Lab-PUSA STFR yagi anogo ka nung ali sample tenet indang macro aser micro nutrients aser ano ali nung aliba physical property tem asadangteter.
Iba sentong nung Lipokmar Yaden, Deputy Director menden liasü. Iba training nung Nagaland kübok district ajunga nungi officer aser staff 38 shilem agidar, ta sangdong ka ajanga metetdaktsü.