Kohima nung State level Youth Festival tenzükogo

Kohima, Metsüremi 09 (TYO): Metsüremi 09, 2018 nü Indira Gandhi Stadium, Kohima nung Youth & Adolescent Development programme kübok State Level Youth Festival tenzükogo.
Iba sentong nung tongti tesemdanger o jembidang Department of Youth Resources & Sports Secretary, Anenla S. Longchari, IAS-i, iba sentong ya takok anguba indang masü saka shilem agia nisung balala ajurutepba, sempet balala repranga ajungshiteptsü atema lir, koba ajanga nükjidongtem ayur, ta ashi.
“Vivekananda-i mapa tajung aika inyakba bilemteta pa nüngtem nung Youth Festival ya 1995 küm nungi ayongzüka akar. Iba küm nungjagi tenzüka Ministry of Home Affairs & Sports, Government of India-i küm shia iba sentong ua ayongzüka akar, koba ajanga linük nung lanurtem ka küma longjemdaktsür,” ta laisa metetdaktsü.
District level nungi takok angurtemi state level nung shilem agir, aser state level nung takok angurtemi National level nung shilem agir, ta laisa metetdaktsü.
Tesasaba olen ka nung Anenla S. Longchari-i, senotsü nung tetsükdaktsü aliba ajanga Department-i iba sentong ya district level nung ayongzüka magiteter, ta ashi.
“Asen lanurtem aika dak sempet tajung keta lir, ajisüaka item sempet sayatsü atema asenok sabang junga mali,” ta shia lai, lanurtem sempet sayatsü atema department-i iba sabang (state level) ya agutsür, ta shisem.
Superintendent, Department of Youth Resources & Sports, Avonuo-i tetenzük sarasadem agia liasü; IGS Academy nungi kaketshirtemi ken ka aten aser Atoli Yepthomi leniba nung iba sentong agia liasü.
Iba sentong ya Department of Youth Resources & Sports-i ayongzük.