Kohima nung Sumi nungertemi Tuluni benjung mungogo

Dimapur, July 8 (TYO) : Bodbarnü Kohima nung Sumi nunger meyirjang aika adenshia ‘Tuluni’ benjung mungogo.
Kohima Tuluni Festival 2015 nung benjung tebuji Road & Bridges (PWD) minister, Y.Vikheho Swu liasü aser tetushi süa jaokerji Kohima Village Council chairman, Neivor Rutsa liasü.
Sumi nunger benjungmung nung Minister Vikheho Swu-i o jembidang ashiba agi, asen state-i mezüng aser tongtipangtibaji Khristan yimsü aru, iba sülen shisaliok bushiba, sorkar aser sen aru.
Asenoki itemji kanga junga shisadangtsüla aser asen tangatetba tajungleni melenshitsüla, ta Swu-i ashi.
Swu-isa sensosangertem dang yimtsüngleni aotsü aser idakji asen tetsü-tebou nungertem sobaliba asentenshitsün atema tayongzükba agüjang ta ashi.
Tang Nagaland sorkar sen agi okronger aser sen noklang nung shilem 65 tashi sorkar mapa inyaker itasen asoshi endoker. Iba ama tensa ka nung nübortemi sorkar khuret angateta aser amalitepa lia yaritepba atema kanga pelar, ta Road & Bridges (PWD) Minister-isa ashi.
Swu ya taoba mapang NSF tir lir aser pai Kohima yimertem dang state yimtiba nung temelenshi tajung aika bener arutsüba atema pelaba metetdaktsü.
Tanü benjung atema tetushi süa jaoker Kohima Village Council chairman, Neivor Rutsa-ia o jembidang Kohima Sumi Hoho dang pelaba metetdaktsü.
Iba benjung nung pa jaokbaji akhümtsübu aser temeim mapa ka lir aser benjung nung adenbaji pa asoshi maongka ulura, ta Rutsa-isa shisem.
Tuluni benjung ajanga Sumi nunger atema dang masü saka Naga nunger telongjem sayur. State yimtiba Kohima ya Naga nunger ajak asoshi lir aser iba jila nung nisung ajak telongjem nung aser yimjung nung alitsü ayongzüker, ta paisa metetdaktsü.
Tanü sentong nung taoba Kohima Sumi Hoho tir & Rtd. Secretary, Vihuto Yepthomi-i Tuluni benjung teratet osang metetdaktsü. Sentong nung minister, parliamentary secretary aser tongti ketdangser aika aden.