Kohima nung Swachh Bharat Mission review senden amen

Monupii/May 07, 2018 nü Raj Bhavan, Kohima nung Ambassador’s of Swachh Bharat Mission review senden nung Nagaland Angh aser Swachh Bharat Mission Brand Ambassador, PB Acharya den Swachh Bharat Mission nung State Ambassador tem tangokba noksa nung angur. 

Kohima, Monupii/May 07 (TYO): Nagaland Angh aser Swachh Bharat Mission Brand Ambassador, PB Acharya-i ayongzüka Monupii/May 7, 2018 nü Raj Bhavan, Kohima nung Ambassador’s of Swachh Bharat Mission review senden ka menogo, ta tanü PRO to Governor sangdong ka ajanga metetdaktsü.
Senden nung jembidang Angh-i State Ambassador temi Swachh Bharat mission-i aginüba ama inyakba atema pelaba lemsatepa liasü.
Paisa Ambassadors dang peipei district shia nung public metsümeshidak yanglutsüla, kechiyong nübur aser nija anema-alibaren nung public metsümeshidak ajanga shilem ka agir, ta metetdaktsü.
Paisa, public metsümeshidak maliba tesemtem nung tetsürtemi timtem kanga ajurur, ta ashi.
Angh-i tzünglu tzü wazüka ayutsü atema lemsatepa liasü. Angh, Acharya-i tzünglu maruba mongpu nung tenem lima nung tzü agi kanga anünger, anungji tzünglu tzü wazüka ayutsü nüngdak, ta ashi. Pai Ambassadors danga peipei district nung nüburtem dang tzünglu tzü wazüka ayutsü atema ajungshitsü metetdaktsü.
Kasa senden nungsa Ambassador temi Angh nem parnoki peipei tesem nung inyakba mapatem aser sentong balala agia arubatem metetdakja liasü. Iba dak alia parnoki reports renema agutsü.