Kohima nung Swachh Bharat Mission senden menogo

Kohima, Monupii/May 10 (TYO): Universal sanitation coverage mapatong tajungba akumtsü aser merükmeju nung rangloktsü nükjidong nung 2014 küm October 2 nü Ato kilonseri “Swachh Bharat Mission” tenzükba ajanga Nirmal Bharat Abhiyan (Total Sanitation Campaign) melenzüka liasü.
Linük tebuti, Mahatma Gandhi nem tapet akhüm agutsütsü atema Mahatma Gandhi sor küm 150 ajungba küm, 2019 nungbo Clean India nükjidong ataloktsü alizüng yur Swachh Bharat Mission (Gramin) mapatong benoka inyaker, aser iba dak sendakba nung Swachh Bharat mission mapatong tashi itshir inyaktsü atema tanü hotel Japfu, Kohima nung Public Health Engineering Department (PHED)-i SBM-G mapatongtem reprangshiba senden ka menogo, ta ketdangsertem osang ka ajanga metetdaktsü.
Iba senden nung Ministry of Drinking Water and Sanitation (MDWS) Government of India, Union Secretary, Parameswaran Iyer densema liasü.
Iba senden ya Water & Sanitation Support Organisation (WSSO) PHED Nagaland-i ayongzük.
Senden nung Solid & Liquid Waste Management ajanga yimtsüngtem nung merükmeju jenjang tajungba akumtsü aser Gram Panchayats/yimtsüngtem Open Defecation Free (ODF) akumtsü aser merükmeju jenjang tajungba akumtsü atema jembia liasü.
IMIS nung upload asüba den Mon aser Tuensang districts nung Individual Household Latrine (IHHL) jenjang mezülongi ainba atema o lemtepba sülen department ketdangsertem dang district anaprong nungji tajemba agia anogo 15 bosa mongzüka tekaratiba nung maparen tembanga Open Defecation Free (ODF) akumtsü atema tetuyuba agüja liasü.
Senden nungsa Geotagging tekaraba nung inyaktsü, IEC mapatong nendaka inyaktsü, state shilem densema civil deposit nung senotsü lemzüktsütsü aser twin pit yanglutsü atema benoka liasü.
Review senden ya Commissioner & Secretary PHED, Dr. Maongwati Aier, IAS leniba nung agi aser WSSO, PHED Director, Er.Y.Tep-i SBM-G Nagaland osang metetdakja liasü.
Senden nungsa Chief Secretary, Nagaland, Temjen Toy, IAS aser Union Secretary, MDWS, GoI, Parameswarn Iyer na leniba nung field officers den SBM-G onük nung lemtepa liasü.
Tang tashi nung state nung district pezü- Mokokchung, Zunheboto, Kiphire aser Longleng district tem ODF ta sangdongogo.
Senden nungsa kobi melii ano district pongu (Dimapur,Phek,Wokha,Peren,Kohima) ODF ta sangdongtsü aser tanüngba district temjia tekaraba nung ODF akumtsü, ta metetdaktsü.