Kohima nung tetsür dak tashiyim mapa inyakba timba akümer

Kohima, November 25 (TYO): Nagaland yimtiba Kohima nung tesüiba küm pungu tsüngda tetsür dak tashiyim mapa inyakba tatalokbatem aika liasü.
2011 küm iba ken o 5 dang liasü saka taküm October ita tashi nung ken o 23 benoka lir.
Kohima nung tetsür dak tashiyim mapa inyakba dak sendakba nung 2011 küm ken o 5 benoka liasü, 2012 nung 7, 2013 nung 16, 2014 nung 14 aser taküm October ita tashi 23 lir, ta Senior Superintendent of Police, Kohima, Joseph Hesso-i ashi.
Bodbarnü Molu Ki, Paramedical nung ‘International Day for Elimination of Violence Against Women’ sentong nung jembidang pai iba osang metetdaktsü.
Item ken o ya Police nem sangoktsübatem dang lir saka aiben tetsür dak tashiyim mapa inyakba osangji miimbanga dang ayur. Ola madoki yutsüba ajanga tashiyim mapa inyakertem tali ajungmesor anungji tetsürtemi ola adoktsüla, ta Joseph Hesso-isa ayongzük.
Ozüng alema inyakertemi tetsür dak tashiyim mapa inyakba kanga bulua ataloker, anungji asenoki Nagaland ya tetsürtem atema lendong maliba tesem ta meshitettsü. Tetsürtem dak ozüng alema mapa inyakbatem rongnung tashiyim agi shi nung medema raksatsüba timba lir. Asen lokti nung tetsür anema mapa inyakba tatalokbatem kanga bulur, ta paisa ashi.
State yimtiba nung tetsürtem aser tanurtem lendong nungi kümzüka ayutsü atema tetsür temeten metetdaktsütsü atema awareness sentongtem agitsüla, ta Senior Superintendent of Police, Kohima-isa tebilemba ka lemsatep.
Kasa sentong nung Kohima Deputy Commissioner, Rovilato Mor, IAS-ia o jembidang ashiba agi, ozüng alema mapa inyakba ajanga lokti nem tajung kecha bener marutsür anungji asenoki iba inyakyim samatsütsüla.
“Tetsür dak tashiyim mapa inyakbaji kilong nungi tenzüker anungji iba inyakyim samatsütsü atema teinyaktsüji kilong nungi tenzüktsüla” ta Rovilato Mor-isa shisem.
Sentong nung Nagaland State Social Welfare Board, Bano Vinito-ia tetsür dak tashiyim mapa inyakba anentsü indang onük jembi.
Iba sentong ya North East Network aser State Resources Centre for Women külemi longjemer ayongzük aser iba anogomung nüngtem nung higher secondary students atema debate competition ka ayongzüka agi.
Tetoktepba nung Mt. Hermon HSS nungi Tsekulhi Thopi aser Kohima Science College nungi Kivi Swu nati külemi mezüngbuba jenjang aser Minister’s Hill Baptist HSS nungi Nagashon Thong-i tanabuba jenjang takoktem angu.
Sentong nung mendenji Research Officer, SRCW, Meneno V liasü aser Upper Nagabazar Baptist Church Pastor, Rokowhelie Pienyu-i temoatsü meshia sarasadem.
Tanabuba shilem nung Secretary & Mission Director of Nagaland State Social Welfare Board, SRCW Daisy Mezhür-i “Towards a gender equality – challenge and strategies’ onük jembi, aser awareness concert ka ayongzüka agidang Alobo Naga and The Band, Symphony Academy of Music, The Elementz, Tiarenla aser Tali Angh nungeri shilem agi.