Kohima nung tilatanurtemi süngdong atem

Kohima nung June 5, 2017 World Environment Day nü Cross Pre-School ketdangsertem den tilatanurtemi süngdong amer agiba noksa nung angur.

Kohima, June 5 (TYO): Nagaland yimtiba Kohima nung tanü World Environment Day (WED) nung tzümopung kümzüka aser wazüka ayutsü atema tenangzükba agiba dang masü saka tesem balala nung süngdong atemba den merükmeju mapa balala inyaka mungogo.
Taküm omen “Connecting people to nature” nung ajemdaker, Cross Pre-School Kohima nungi arishi küm 4 tain kaketshirtemi Old Age Home, New High Court Complex nung süngdongtem atem.
Parnok den tesayurtem aser Cross Wonder Church nungi lanurtemi yaritepa liasü.
“Onoki tanurtem dang World Environment Day indang tetezü chichiba angatetdaktsünür. Iba jagi tanurtemi süngdong atemba nung ozü lanurtemia yaritep” ta Cross Wonder Church Kohima Senior Pastor, Rev. Ketou Theünuo-i ashi.
Angami Youth Organisation(AYO)-ia tzümopung kümzüka aser wazüka ayutsü atema mezüngbuba shilem mapa inyakdang, Kohima jila nung süngdongtem temyonga senzü.
AYO tir Neinguvoto Krose-i ashiba agi, parnoki State Civil Secretariat tesem nung temulung agüja iba mapa inyak aser parnoki Secretariat Park merüktetba dang masü saka tobur tajung süngdongtem atem.
AYO kübok yimtsüng aser tzükong unit temia pei pei temeket nung süngdongtem atem.
State sorkar ajungmesoa AYO züngsemtemisa Town Hall Kohima yangluba kimung merükteta liasü. Iba ki ya yanglutor joko küm aika süia arur. Parnokisa Kohima jila tesem balala nung merükmeju mapa inyak.