Kohima nung ‘Tribute Concert’ alitsü

Kohima, October 15 (TYO): 1970s nungi 1990s tetenzüklen Nagaland nung kentenertem teloktep- Naga Musicians Collective (NMC)-i October 25 aser 26 anogotem Tribute Concert ayonga amongtsü.
Yasüng Hotel Japfu nung osangbener den jembidang Organizing committee Convenor & NMC Advisor Vipopal Kintso aser NMC president Andrew Ngully nati ashiba agi “Tribute Concert” ji The Heritage, Old DC Bungalow nung nikongtsütsü 5:00 ako nungi tenzüktsü.”
Iba sentong ya Task Force for Music and Arts, Government of Nagaland den yaritepa agitsü. Sentong indang omenji “Come Together” lir aser iba ya Naga nunger asür kentener 22-25 shi ka nem tetushi agüja amongtsü, ta Kintso-i ashi.
NMC-i excellence in music indang award ka agüsütsü aser ibaji kenten sentong mezüng anogo nung agütsütsü. Iba sentong nung Methaneilie Jutakhrie, DGP Band, Squadron, Dr Neikiesalie Nicky Kire & friends, retired Chief Secretary Alemtemshi Jamir, Dr Kethoser Kevichusa, Narola Jati aser Linda Solo nungertemi shilem agitsü, ta paisa shisem.
NMC ya registered society ka lir aser kentenertem aser kentenbaren meimertemi tentetba lir, ta Ngully-ia ashi.
State nung kentenbaren ajungkettsü nükjidong nung NMC-i kenten benjong balala ayonga amongtsü. NMC-isa sound, lighting, staging ama control production equipments renemtsütsü, ta paisa ashi.
Events Secretary Atha C. Angami-ia ashiba agi, NMC nung tang Kohima aser Dimapur nungi züngsemtem lir aser tarutsü nung tanga district tem nunga kongsangtem lapokyonga aotsü.
NMC press & publicity secretary Pfuche Koza-i tayongertem tenüng nung asür kentener kinungertem aser kenten meimertem dang iba sentong nung shilem agitsü mepishia metetdaktsü.
“Tribute Concert” atema ticket jenjangji Rs 200 aser Rs 2000 (donors entry two) asütsü aser Music Garage, D Block, Sports Inventory Opposite Indoor Stadium, Symphony School of Music, Unitex Opposite War Cemetery, Dream Café, Popular Bakery High School Junction aser Kiwi Store Jail Colony nung angutsü, ta Koza-isa metetdaktsü.