Kohima nung tzümetsüng ajanga timtemer

Dimapur, August 7 (TYO) : Tesüiba anogo ishika state yimtiba Kohima nung tzünglu aruba ajanga tzümetsüng aser anentsüh ajanga nisungtem timtemer.
Sanuorü ayong nungi tzü talila ayimba ajanga Working Women Hostel anasa aliba tesem tzü agi mobanga lir aser iba ajanga New Secretariat leni aoba lenmang shibanga atar, ta Kohima Traffic Police-i tanü metetdaktsü.
Iba lenmang ya osang ka mesangdong tashi shibanga atatsü anungji Working Women Hostel adena mesenzüi Tinpatti-DBS-Kohima College mesüra High School junction-Meriema-NBCC Convention Hall lenmanglen senzütsü metetdaktsür, ta Kohima Traffic Police-isa ashi.
Ano külen, Kohima Deputy Commissioner, Rovilatuo Mor, IAS-ia August 7, 2015 nü New Secretariat Road nung Sanuorii ayong nung tzü tali ayimba ajanga lenmang/apu tashi mait kümogo, anungji tzü ajema maküm tashi iba lenmang nung mesenzüi atatsü metetdaktsür, ta sangdong ka ajanga metetdaktsüogo.
Tzünglu maneni aruba ajanga Sanuorü ayong nung tzü talila mobanga ayimer aser culvert ka noktanga aliba ajanga tzü azüklen feet 40 shi metsüngbanga lir.
State sorkari tzü atsüdoktsü atema maparen balala inyaker saka tzünglu kanga aruba ajanga takok monguteti lir.