Kohima nung ‘Umang Festival’ amung

(L) Nagaland Angh, P.B. Acharya kinüngtsü Kavita Acharya-i o jembiba mapang & (R) Tabitha Enabling Academy kaketshirtemi Chicken Dance sayudang.

Kohima, August 23 (TYO) : Union Ministry of Culture aser North East Zone Cultural Centre (NEZCC)-i acha-ayanga North East Region nung ‘Umang Festival’ amunger aser tanü Nagaland nunga iba benjung ayongzüka mungogo.
Kohima nung aliba North Field School nung ‘Umang Festival’ amung aser iba sentong ya NEZCC-i Tabitha Enabling Academy, Kohima den yaritepa agi.
Tanü sentong nung Assam, Meghalaya aser Nagaland nung sempet balaka aliba tanurtemi tsüngsang, kenten aser art ajanga shilem agi.
Sentong nung tongti tesemdangerji Nagaland Angh, PB Acharya kinungtsü Kavita Acharya liasü aser lai o jembidang, “sobaliba sentongtem ajanga sempet balaka aliba tanurtem lokti dangi anir arutsü aser sendakteptsü atema Umang-i maongka agütsür aser iba sentong ya kanga tajung” ta metetdaktsü.
Iba benjung ajanga osang prokshiba dang masü saka sempet balaka aliba tanurtem indang taküm, otsü aser sempettem asen tenük agi ngua parnok nem tenüngsang agütsür. Ajisüaka, ajak dang tongtipangtibaji asenok ajak Tsüngrem mesükba nung yanglu ta asenoki bilemtettsüla, ta Kavita-isa ashi.
Iba benjung ya Union Ministry aser North East Region nung NEZCC ajanga ketdangsüa agir, ta sentong nung NEZCC Joint Director, Talinokcha-ia ashi.
Paisa ashiba agi, Umang festival indang alizüngji sempet balaka aliba tanurtemi pei sempet sayutsü aser ano tanga tanurtem den ajurutepa sensaksemtsü atema lir.
Kohima dak alia North East Region kübok Ziro (Arunachal Pradesh), Jorhat (Assam), Imphal (Manipur), Tura (Meghalaya), Aizawl (Mizoram), Gozing (Sikkim) aser Agartala (Tripura) nung iba benjung amunger, ta paisa shisem.
Tanü agiba benjung nung Tabitha Enabling Academy ajanga Chicken Dance, G. Rio School nungi Kevivor-i ken ka, Meren, Imtilong & Yoyo nungeri Thriller aser Visually Impaired Institute Dimapur nungi shilem balala agi.
Anosa, Assam nungi tanur 8-i sobaliba ken ka aten aser Roilang Vocational Training Centre Meghalaya nungi tanur 8-i Shad Shoh Kba ia sayu.