Kohima nung Vigilance Awareness Week 2016 amung

Kohima nung Vigilance Awareness Week tenangzükba agidang tangokba noksa angur.

Dimapur, November 1 (TYO) : November 1, 2016 nü Kohima Deputy Commissioner indang Conference Hall nung Vigilance Awareness Week 2016 amung.
Iba sentong ya District Administration aser Lead Bank, Kohima nati yaritepa ayongzük aser omenji “Public Participation in Promoting Integrity and Eradicating Corruption” liasü.
Sentong nung Kohima Deputy Commissioner, Rovilatuo Mor, IAS-i o jembidang, “iba onük ya kanga teputep lir aser iba ya kanga tongtipang. Sorkari anogoshia ketdangsüba nung iba ya bilema inyaktsüla,” ta ashi.
“Ochimashiba ji Government/Private Institutions nung dang masü saka public sectors ajak nung lir. Asen loktiliba nung ochimashi azüoktsü atema public-i tenük yoktsüla aser ola adoktsüla” ta Kohima DC-isa ayongzük.
Public-i shilem agiba ajanga mapa inyaksangshiba nungi ochimashi agientsü. Senotsü aser tanga tsütsü ochimashiba dang masü saka mapang nung ochimashi ya kanga tongtipang lir. Anungji, sorkar mapa inyaker ajaki public nem tetsükdaktsü majurudaktsütsü atema mapa shitak amshitsüla, ta Rovilatuo Mor-isa ashi.
Tanü sentong nung Assistant Commissioner, Reny Wilfred IAS-ia o jembidang, “developed countries nung anguba ama Nagaland nunga mobile tajungtiba, gari tajungtiba lir, ajisüaka gari lenmang, shisaliok aser health tsütsü Nagaland ya India kübok aliba state tem rongnung jenjang teküpoktiba nung lir” ta ashi.
Ochimashi anema nokdakba telok balala lir saka sorkar mapa inyakertem azüoktsübaji public dak tashi lir. Anungji, public-i teinyaktsü sentong atongba nung shilem agitsüla aser ochimashi agientsü atema teinyaktsütem meteta inyaktsüla, ta Reny Wilfred-isa ashi.
Nagaland nung ‘communitization programme’ ya alima nung inyakyim tajungtiba rongnung ka lir. Iba ya ajanga asenoki ochimashi anema raratettsü aser kechisarena ajaklen terenlok bener arutettsü. Anungji, public-i ochimashia anema raraba nung shilem agitsüla. Aji asü nungdang, Nagaland state nung terenlok alitsü, ta paisa shisem.
Sentong nung mendenji Additional Deputy Commissioner, Kohima, Lithrongla Tongpi liasü, AGM, SBI, RBO, Dimapur, Thangboi Lunkim-ia o jembi aser Chief Manager, Lead Bank Kohima, Lanuteka Imchen-i anküp tepela o jembi.