Kohima nung World Cup lapokba sentong live sayu

Kohima, Aami/June 14 (TYO): Naga nunger rongnungi nüngtugu football asayar asür Dr Talimeren Ao sor küm 100 ajungba nüngtem nung taküm küm tepeyong benjung balala ayongzüka agia arudar aser tang iba nung shilem ka ama Department of Youth and Sports puri Russia 2018 FIFA World Cup lapokba sentong Kohima Local Ground nung sayuogo.
Youth Resources & Sports Department kübok District Sports Council puri ground teyong nung süklep 20/12 talang LED screen ka amenoka lir.
World Cup lapokba sentong metenzük tsüngda o jembiba mapang nung Advisor for Youth Resources & Sports, Zale Neikha-i ashiba agi, PDA sorkari Dr T Ao tushia aser pa sor küm 100 ajungba nüngtem nung Kohima, Dimapur, Mokokchung aser Mon nung WC lapokba sentong, semifinal aser final live sayutsü.
Dr T Ao indang jembidang Neikha-i ashiba agi, pa ya Indian contingent flag bearer liasü aser India football team London Olympics nung 1948 küm asayaba mapang pa captain liasü. India nunger tang tashi nung Olympic nung khen dang shilem agia lir.
Paisa iba ama saisapong ka live sayuba ajanga lanurtem ajangzüktsü imlar aser saisapong yimyayimpong tajung anagzüka benshiba ajanga T.Ao ama jenjang temaba tongtettsü imlar, ta ashi.
Kasa mapang nung Dimapur nunga the Department of Youth Resources & Sports den district administration-i achaayanga Dimapur stadium Badminton hall Aami/June 14 nü Fifa Football World Cup 2018 lapokba sentong nung live sayuogo.
Football asaya meimertem aika iba asayamung lapokba sentong arua reprangogo, koba LCD screens asem tashi nung sayua liasü.
Departmentof Information & Public Relations puri adokba nüngtugu football asayar asür Dr T.Ao indang Documentary film ka FIFA World cup metenzük tsüngda sayua liasü.
YRS Director, Imtirenla, DSO Dimapur, coache aser YRS staff tema iba sentong nung arua aden. Iba sentong ya YRS Department puri 100 day initiative ayongzükba nung shilem ka lir.