Kohima nung World Drug Campaign sentong ayonga agi

Kohima, June 27 (TYO): June 26, 2019 nü International Day against drug abuse and illicit trafficking anogomung nung Kohima District Jail, Kripa Foundation, KDLSA, ARK Foundation, NUN & KUN-i senteper Kohima District Jail nung World Drug Campaign ayongzüka agiogo, ta ketdangsertem osang ka ajanga metetdaktsü.
Kripa Foundation Director, Abou Mere-i, temesepba mozü achirtemi pei temeden memetet, aser mozü achirtemi parnok anema benshibatem anema ola madokteter, ta tesasaba olen ka metetdaktsü.
Paisa, jail nung alirtemi voluntary rehabilitation agizüktsüla aser sorkari recognize süa aliba rehab, mental health institute mesüra juvenile home nung admit asütsüla, ta ashi.
2016 küm sangdongba Nagaland State Drug Abuse Prevention and Treatment Policy indang metetdakja pai, iba sülenbo mozü achiba yimya ya tashidak ka ama agizük, ta ashi.
Iba dak sendakba nung pai, mozü achiba yimya mesüra iba tebilemtsü ya ozüng alema inyakbayim nung masü saka “health centric” tsütsülen nungi yaritsüla, ta ashi.
Keduvi Zhotso (KDLSA)-i Narcotic Drugs and Psychotropic Substance Act, 1985 kübok legal inyakyim indang lemsatepa liasü.
Iba Act nung onük aika lir aser iba dak sendakba Act nung aibelenba atema temerenshi aika lir, ta shia pai, iba ya special act ka lir, kechiyong iba ya ajanga narcotic mozü aser psychotropic substance balala yangluba, tsünüba, abenba, ayokba, shibelenba, rizünga ayuba mesüra achiba nokdanger, ta ashi.
Item ozüng nung aibelenertemji küm aika tepoukdak ayutsü, taküm piyong ayutsüa akok mesüra tasüba temerenshi-a agütsütsü akok, ta ashi.
Zhotso-isa, India nung NDPS Act ya kanga tongtibang; mozü tim mesüi achiba ajanga India sorkari linük nung mozü tapu 344 nokdangogo, ta ashi.
Ketho Angami (ARK Foundation)-i, mozü tim mesüi achiba aser mozü achiba ajanga takoksa balala anguba indang lemsatep.
Paisa, mozü ya tajung, ajisüaka medical atema mesüi tim masüba nung chira majung, ta shia pai jail nung alirtem dang, pai temeden metettsüla, pei yimya jangjatsüla aser teyari bushitsüla, ta ashi.
Kasa sentong nung Renbonthung Tungoe (ARK Foundation)-i mozü achiba tebilemtsü indang lemsatep aser Sanjay Yadav (KUN)-ia pa taküm nung ajangshibatema lemsatepa liasü.