Kohima nung WW II tongbang rarar küm 75 ajungba bilemtet

Kohima, Rongchii/April 04 (TYO): World War II mapang Kohima nung tongbang kanga sashia rarar küm 75 ajungba anogomong Brihostibarnü RCEMPA, Jotsoma nung bilemteta mongogo, ta tanü ketdangsertem osang ka ajanga metetdaktsü.
Iba rara ajanga linüktem aser nüburtem longjemdakja temelenshi adok; yamaji “Remembrance, Reconciliation, Rebirth” omen nung ajemdaker iba anogomong mongogo.
Iba tongbang nung senti taküm meyirjang aika asüba bilemteta Ambassador of Japan to India, Kenji Hiramatsu-i, tanü asenok yimjung nung aliba ya tenla tulu ajanga yangertetba lir, joko Japan linüki tesamatsüba rara nung kodanga shilem magitsü bangjemer, ta ashi.
Hiramatsu-isa, Japan aser North- East India tesendaktep kanga tajungba kümogo, aser tesem nung terenlok aliba den nüburtem tsüngda, talisa lanurtem tsüngda shisa lemsateptsü atema küm ana tejaklen Act East Forum ya tenzük, ta metetdaktsü.
Hiramatsu-isa, Japan-i northeast nung lanurtem atema IRIS program inyaker, aser Technical Intern Training program ajanga Japan-i North-East nüburtem jaoktsü melunga lir, koba ajanga nüburtem tsüngda tesendaktep tashi itshitsü, ta ashi.
Pai ashiba agi, North-east region den shisalemsatep aliba ajanga asenok senteper tayongzükbatem koktettsü.
Iba sentong nung jembidang British High Commissioner to India, Sir Dominic Anthony Gerard Asquith-i, democracy aliba linüktem India, Japan aser UK longjemer alima nung yimjung aser azükaru atema inyaker, aser longjemer tayongzükbatem koktettsü atema inyaker, ta ashi.
Iba anogomong sentong nung state Chief Minister, Neiphiu Rio-i, World War II sülen Naga nungeri rara aser azütokshi jenti ajangshiogo, ajisüaka tesüiba küm 20 tsüngda Nagaland nung tesünep lir aser terenlok lenmang nung jajadar, ta metetdaktsü.
Nagaland-i terenlok project balala atema JICA (Japan International Co-operation Agency) den partner ser inyaker, ta shia Rio-i, item ama projects atema teyari nüngdaker aser state terenlok atema amalitep nüngdaker, ta shisem.