Kohima nung Yimchungrü nungertem Metümneo benjung amung

Kohima, August 8 (TYO) : Honibarnü Kohima nung Yimchungrü nungertem Metümneo benjung kanga longsoa mungogo.
Iba benjungmung ya Yimchungrü Union Kohima (YUK)-i New Ministers’ Hill nung Parliamentary Secretary R. Tohanba’er kidang ayongzüka amung.
Sentong nung tetushi süa jaokerji Yimchungrü Gazetted Officers Association tongti tezülur, Showuba Yimchungrü liasü aser pai o jembidang ashiba agi, “Metümneo ya asen tanela akhümtsübuba, akümli nungi pilartem asoshi sarasademtsüba aser tesüiba nung aibelenbalatem meyipa reprangshiba mapang ka lir.”
“Pei kin tejakleni aotsü atema mezüngbubaji kija shia bendanga agüja inyaktsüla” ta Showuba-isa benjungmungertem ayongzük aser paisa sobaliba akhümtsübutsü aser lanuputu dang sayutsü atema ajungshi.
Tanü sentong nungsa Eastern Nagaland People’s Organisation (ENPO) tatong tir, Kekongchim aser SDC(C) Jakhama Athsangla nati o jembi.
Sentong nung mendenji Executive Chairman YUK, John Tochimong liasü, Yimchungrü BBK Lungri Nungti-i temoatsü meshia sarasadem aser YUK senyuri Metumneo benjung indang teratet ashi.
Sentong nungsa YUK Tir, Kejingkhum-i tesentepertem pela agizük, YUK general secretary Kiutsuthong-i anküp tepela o jembi aser Yimchungberü Cultural Club Kohima, Shophu Nungrü o Akhyum & Kumri nungertemi kentenba shilem agi.