Kohima Police-i auer ka apu

Kohima, February 25 (TYO): February 21, 2017 nikongdang 2:00 ako nung Lower Forest Colony, Kohima nung alir kati FIR ka agutsü, aser iba FIR nungji February 20, 2017 aonung par kidang auertemi license aliba .32 Pistol ka den sen 5,000 shi auya ta shia lir, ta tanü Sub – Divisional Police Officer (South) & PRO Kohima, Nagaland, Atu Zumvü NPS-i sangdong ka ajanga metetdaktsü.
Iba nungji ajemdaker Kohima Police-i bushisüngdang tenzük aser osang tejangja ka lazükba nung ajemdaker Lower Naga Bazar, Kohima nung telidak aser Zunheboto district kübok Ghokimi yimer Ghonito Swu’er jabaso arishi küm 20, Hukato Swu apu, iba sülen auyaba .32 Pistol ji Lower Naga Bazar nungi ngutetogo, ta kasa sangdong nungsa shia lir.
Asüngdangyaba mapang tai tonglokja alisang jagi item auyaba nungji pa densema aliba nangzükogo; iba dak sentakba nung Kohima South Police Station nung ken o ka benoka maneni bushisüngdangdar aser licence pistol ji tim kibur nem agutsüogo, ta kasa sangdong nungsa Atu Zumvü NPS-i metetdaktsü.