Kohima Police-i ganja seret 1,000 apu

Kohima, October 06 (TYO): October 06, 2017 anepdang 6:00 ako meta Phesama check gate anüker Kohima Police temi garitem sota mita reprangba mapang nung Dimapur leni aluba truck ka- registration number NL01K-5910 soter mita reprangdang ganja seret 1,000 shi apu; ibaji National market nung sen 50,00,000 shi jenjang lir, ta tanü Sub-Divisional Police Officer (South) & PRO Kohima, Nagaland, Atu Zumvü, NPS-i sangdong ka ajanga metetdaktsü.
Ganja ji taseptsü 61 nung seret 20, seret 10 aser seret 5 telemsa nung seper gari nung miima liasü.
Gari anisangji Manipur state, Senapati district kübok Thungjoy yim nungi Ngaopuni’er jabaso arishi küm 21, Duh Peter lir ta jangjaogo aser pa den alisangji Senapati district kübok Makhel yim nungi Khumu’er jabaso arishi küm 20, Hrüyio liasü.
Asüngdangyaba mapang nung gari anisang jagi police dang, Mao nung ganja ji oshiket aser ibaji Dimapur tongtsüba atema pa nem sen 10,000 agütsütsü ta nangzüker liasü, ta nangzük.
Iba dak sendakba nung Kohima South Police Station nung NDPS Act kübok ken o ka benokogo aser maneni bushisüngdangdar, ta kasa sangdong nungsa shia lir.