Kohima police-i ganja seret 114 bena aru; aüer ka apu

Dimapur, January 14 (TYO): Kohima kübok Khuzama interstate check gate nung duty inyakba Kohima police ketdangsertemi ozüng alema mozümora shibelener nisung 4-i ganja seret 114 taret bena aliba bushitetba osang ka Atu Zumvü, NPS, Sub-Divisional Police Officer & PRO, Kohima, Nagaland-i tanü sangdong ka ajanga metetdaktsüogo.

Ozüng alema mozümora shibelenba ken o ajemdaker police-i Manipur kübok Senapti nung alir arishi küm 45 tain Tho-o, arishi küm 29 tain Jarvis, arishi küm 27 tain Dahü aser arishi küm 40 tain A. Kaisa nunger pua parnok anema Khuzama P.S Case No. 002/16 U/S 20 (b) (II) (A) NDPS Act ken o benokogo.

Ano külen, Kohima kübok Jakhama yimtsüng nung alirtemi Khuzama Police Station nung ken o benokba sülen police ketdangsertemi Jakhama nung alir aüer ka, asür Vilazeho’er jabaso, Viphreto tangar kidangi tashiyim agi ia ki o jen aüyaba ken o nung ajemdaker apuba osanga jangjaogo.

Police-i Viphreto ket nungi LPG cylinder 7, Printer 2, litre 1000 Syntex 1, litre 300 Syntex 1, tabentsü sü 9, süpeti 4, table lamp o charger 1, rice cooker 1, pressure cooker 1, LPG milen 1, aüso & marok 6, dinner set 1, CGI sheet 73, Dunlop cushion 11, barbed wire roll 2, 14″ colour TV 1, nok 1, yipden 2, folding table 1, table cloth & curtain 2, pillow cover 2, stool 1,

Iron saw 1 Iron Lever 2 bena arua kibur nem meyiptsüogo.

Viphreto pua ayuba sülen pa anema Khuzama P.S Case No. 001/16 U/S 457/450/380 IPC ken o benokba osanga metetdaktsüogo.