Kohima Police-i ganja seret 990 apu

Dimapur, September 27 (TYO) : Kohima Police-i Phesama police check gate nung garitem mita reprangdang truck gari (NL01L0476) ka nung ganja seret 450 bena aliba apu.

Ganjaji taseptsü 40 nung kanga junga sepbanger miima bena liasü aser ganja indang jenjangji National market nung sen lakh 22.50 shi alang liasü, ta Sub-Divisional Police Officer (South) & PRO Kohima-i sangdong ka nung metetdaktsü.

Iba dak sendakba nung police-i nisung asem apu aser parnokji, Kapao yimer Lole’er jabaso Lole Rapei, Maram nungi Kumar’er jabaso Ashok Sonar aser asür Koide yimer Weiru’er jabaso Daniel Poumai nungertem lir ta jangjaogo. Parnok ajak ya Manipur kübok Senapati district nungi lir, ta Kohima Police-isa metetdaktsü.

Ano, Kohima Police-isa Peducha police check nung garitem mita reprangdang Guwahati-i aoba truck gari ka nung ganja seret 540 bena aliba apu.

Truck gari nung miima bena aliba ganjaji National market nung sen lakh 27,00,000 shi alang liasü, ta Kohima Police sangdong ka nung metetdaktsü.

Ganjaji truck gari nung oset miima abenba takdang balaka nung taseptsü 26 nung seret terpungugu aser taseptsü 30 nung seret pungugu enoker bena liasü, ta parnokisa ashi.

Iba truck gari anirji Hemanta Thakuria lir aser pa ya Kamrup, Assam kübok Amabari nungi Lawanja Thakuria’er jabaso ta jangjaogo.

Police-i Hemanta dang asüngdangya asüdang, ganjaji Kanglatongbi, Imphal nung aben aser ganja kibur Mima (Manipuri tsür)-i pa dang Guwahati tashi tongtsü nungbo sen meyirjang 20 agütsütsü ta nangzük, ta pai ashi. Iba dak sendakba nung Sechü (Zubza) P.S nung ken o ka benokogo maneni bushisüngdang südar, ta Kohima Police-isa metetdaktsü.