Kohima Police-i gari ka angu; Sen lakh 13 alangba ganja seret 260 apu

Dimapur, May 29 (TYO) : May 28, 2016 nü Kohima police-i Peducha check gate nung garitem mita reprangdang Tata Xenon gari ka sota ayu.
Tata Xenon gari (NL-07A/5863) indang chassis aser engine number ji smart card (RC book) den meputep ta NCRB database osang ajanga bushitet aser Registration Card (smart card) tiyazü ka bener gariji amshiba putet. Iba dak sendakba nung Welewu Keyho ta ser nisung k apu, ta Sub-Divisional Police Officer (South) & PRO Kohima-i sangdong ka nung metetdaktsü.
Welewu ji Phek kübok Mesulumi yimer Vekusa Keyho’er jabaso ta jangjaogo aser Kohima Sechü(Zubza) PS nung ken o ka benokogo, ta Kohima Police-isa metetdaktsü.
Kohima Police-isa Khuzama inter-state check gate nung Manipur leni aoba truck gari ka nung ganja seret 260 bena aliba apu.
Truck gari (MN-06T/0226) nung bena aliba ganja indang jenjangji sen lakh 13,00,000 shi indang liasü aser ganjaji kanga junga miimbanger bena liasü, ta Kohima Police-i metetdaktsü.
Iba dak sendakba nung Senapati, Manipur nungi Punii’er jabaso P. Duzii Gideon apu aser pa anema Khuzama P.S nung ken o ka benokogo, ta sangdong nungsa shia lir.