Kohima police-i gari mita reprangdang gari ana apu

Kohima, April 07 (TYO): April 6, 2016 aonung 11:50 ako meta Khuzama inter-state check gate nung Kohima police-i registration No. NL0-7A-5451 tipper truck ka registration number tai inoker apuba sülen jungjunga mita bushidang gari kuli kaket balala ana angu, ajisüaka gari kaket anaprong nung aliba engine aser chassis number ji gari nung keta aliba denji memedem, ta Sub-Divisional Police Officer & PRO Kohima, Atu Zumvü NPS-i sangdong ka ajanga ashi.
Iba dak sentakba nung Assam, Barpeta district kübok Haldapathar yim nungi arishi küm 26, Md. Mainul Haque apu.
Pa ket nungi mobile handset ana aser sen 5000/- puogo aser iba dak sentakba nung Khuzama PS nung ken o ka benokogo.
Ano tanga tatalokba ka nung Anti Vehicle Theft Squad (AVTS), D.I.B of DEF Kohima aser A/10 NAP (IR) sepaitem senteper Zhadima Junction Kohima nung gari mita reprangdang registration No. NL-06-2602 Chassis No. 1645231, Engine No. 2294641 aliba Maruti 800 ka mulung melemi sota apuba sülen reprangdang gari indang engine aser chassis number ji Vahan Database aser smart card( RC book) nung aliba den balala liasü.
Iba dak sentakba nung gari kibur, Kmiyato Awomi (31 yrs) anema Kohima Chiephobozou PS nung ken o ka benokogo aser maneni bushisüngdangdar, ta kasa sangdong ajanga ashi.