Kohima Police-i Inner Line Permit malir nisung 14 apu

Dimapur, September 20 (TYO) : September 19, 2015 nü DEF Kohima nungi District Intelligence Branch-i Kohima jila nung ajungbena mita aodang Inner Line Permit malir nisung trok apu.
Parnokji Karimganj, Assam nungi Muzibur Rahman, Motihari, Bihar nungi Umesh Kumar aser Muna Kumar nungertem lir. Parnok den külemi apuba nisung asemji tem dang lir aser iba jagi parnok tenüng yimjak nung memetetdaktsüi atar, ta Kohima Police sangdong ka nung metetdaktsü.
Iba dak sendakba nung Kohima North P.S nung BEFR Act kübok ken o ka benokogo, ta sangdong nungsa shia lir.
Kohima district nung ILP maparen tenzükba sülen Khuzama P.S nungi police teloktemi mapang shia mita repranger aser September 19 nü Mima aser temeket aliba tesem nungi ILP malir nisung 8 puogo.
Parnoki apurtemji Purwi Champaram, Bihar nungi Vigu Sah, East Champaram, Bihar nungi Jiyalal Das, Ashok Das aser Manoj Kumar, Goalpara, Assam nungi Hajrat Ali aser Ismail Hussain, Motihari, Bihar nungi Ponamaji aser Nagaon, Assam nungi Md. Siddiue Ali nungertem lir.
Khuzama P.S nung parnok anema ken o ka benokogo, ta Kohima Police-isa metetdaktsü.