Kohima Police-i nisung ashioktsür ka apu

Dimapur, Aami (June) 12 (TYO): March 2016 nung Kohima South Police Station nung senotsü külakoktsüba aser ashioktsüba ken o ka benokba nung tongti süa tai tongloktsür ka Kohima Police-i puogo.
Iba ken o nung IRDA indang Customer Support Agents ama mapa inyakba aser parnoki customers dang phone ajanga Insurance policy tem nung sen rizüngba ajanga sen aika aputettsü ta shia nisungtem ashioktsü, ta Addl. Superintendent of Police & PRO, Kohima Police sangdong ka nung metetdaktsü.
Kohima nung alir ka iba telok indang sang nung ashi aser pai sen lakh 50 tashi rizüngba sülen ang parnoki pa ashioktsüba meteta aru.
Kohima Police-i iba ken o bushisüngdangyonga aruba sülen tai tonglokja alirtem rongnung 24 North Parganas, Kolkata nung alir Prosenjit Das dena lia ta bushitet. Iba nung ajemdaker Investigating Officer kati anir telok ka Kolkata-i ao aser Aami (June) 11, 208 nü Kolkata Police teyari agia iba nisungji apu, ta Kohima Police sangdong nungsa metetdaktsü.