Kohima Police-i Scooty & Motorbike angu; Ganja & Ginseng shibelenertem apu

Dimapur, August 5 (TYO) : Kohima police-i Kohima jila nung garitem mita reprangdang Scooty ka (B/R No. NL-01E-2522, Chassis No. MCDND1B1V91J00414, Engine No. PFE9J219001) apu.
Classic Point Kohima nung police-i temulung melemi bilemba agi Scooty soter reprangdangdang, Scooty indang steering lock raksar liasü aser iba jagi tanisangji apu, ta Kohima Police sangdong ka nung metetdaktsü.
Police-i apuba nisungji James Rengma’er jabaso Obed Rengma lir aser pa ya New Reserve, Phesama nung telidak lir. Pa dang asüngdangya asüdang pai Officers’ Hill colony, Kohima nung Scooty ji auya ta nangzük.
Iba dak sendakba asoshi Kohima South P.S nung ken o ka benokogo aser Scooty kiburi kulikaket teperi bener arur police ket nungi Scooty agizüktsü metetdaktsüogo.
Ano, August 4 nü Kohima police-i Secretariat anasa nungi Yamaha R15 motorbike ka ngutetogo.
Iba bike samaba ken o ya Dimapur West Police Station nung benoka lir aser police-i Obed Tena ta ser nisung ka apu.
Pa ya Tukuliga yimer Yehokho’er jabaso lir aser Nagabazar, Kohima nung telidak lir ta jangjaogo. Pa den külemi bike ji Dimapur West Police Station ket nung agütsüogo.
August 4 nüsa Kohima police-i interstate check gate nung garitem mita reprangdang Tata Sumo gari ka nung ganja seret 29 bena aliba apu.
Ganjaji tetsür anati abenba liasü aser tenaji Vafume yimer Thekhu Poumai’er jala Levis Poumai aser Bouchie yimer asür Purhu Poumai kinüngtsü Shove Poumai na lir ta jangjaogo. Tenaprongla ya – Senapati, Manipur nung alir, ta police sangdong nungsa shia lir.
Iba dak sendakba asoshi Khuzama P.S nung ken o ka benokogo aser maneni bushisüngdang südar, ta police-isa ashi.
Kasa anogo nungsa, Tata Winger gari ka nung ginseng tapu ka Paris Cautifolia seret 28 bena aliba apu.
Ozüng anema shibelenba mozüji Senapati nunger Makhan kinüngtsü Adaha Mao ket nung apu aser la anema ken o ka benokogo, ta Kohima police-isa metetdaktsü.